Loading

2012-08-23

حكاية مسعود

حكاية مسعود - الثلاثى المرح
ألحان: على إسماعيل



غنيلى يا جدع على دقة الخلاليل
ده الجرن (1) والجمع (2) خلى الصبايا تميل
تملى القنانى أغانى على دفتين النيل
غنى يا جدع غنى

يا صبايا يا غنوة فى بلدى
بتلالى من غير عود
تكعيبة العنب البلدى
شايلاها انا ف عنقود
مسعود والقمرة شعاع متحنى
على كف الواد مسعود
مسعود الخولى يا عينى
أستنى الأرض تجود
باع قطن الخير والغلة
وإتجوز بدر الليل
غنى يا جدع غنى


ع الناى سمعنى وغنى
غنيوة تشد الحيل
ده الفجر صبية بتهمس
فى ودانى من المواويل
مسعود إرتاح إرتاح
على خدها التفاح
والأرض الحلوة إخضرت
وبقت كلها أفراح
ومراته وراه ع النورج (3)
بتقول للغيط يا جميل
غنى يا جدع غنى

فرشوا المناديل ع الضلة
والشمس عليهم هلة
واللى بيغنى لقطنه
واللى بيضحك للغلة
مسعود يا ابو الحبايب
قلبك مليان عجايب
مسعود الارض عيونك دى
وإلك فى الجد نايب
وبلدنا والله صبية
فى الليل رمشها قناديل
غنى يا جدع غنى

(1) الجرن: مخزن القمح.
(2) الجمع: جمع القمح.
(3) النورج: آداة لحفر الأرض.

 روابط تحميل الأغنية بجودة عالية